This gallery contains 11 photos.
HAURREN DOLUARI BURUZKO TAILERRA
Joan den ortziralean, maiatzak 17, arratsaldeko 17:00etatik 19:00etara, Parkeko Ikastolan, Aingeru Oiartzabal psikologoaren eskutik, gurasoendako tailerren barne, “Haurren dolua” gaia hizpide izan genuen.
Dolu prozesua ezagutzeaz gain, galera baten ondoren sortzen diren erreakzio emozionalak normalizatzeko jarraibideak eman ziren. Aunitzetan helduok heriotzaz jarduten garenean, haurrak lasaitu ordez nahasmena sortzen diegula agerian gelditu zen eta honelako egoeren aurrean jokaera egokien inguruko aholkuak eman zituen Aingeruk.
Esker mila, Aingeru, aberasgarria izan da tailerrean parte hartzea!
Advertisements
HAURREN DOLUARI BURUZKO TAILERRA
Hurrengo ortziralean, maiatzak 17, arratsaldeko 17:00etatik 19:00etara, Goitiko Ikastolan, Aingeru Oiartzabal psikologoaren eskutik, “Haurren dolua” tailerra izango dugu. Gurasoak ahalik eta neurririk eraginkorrenean, dolu prozesuan dauden seme-alabei laguntzarik egokiena eskaintzea du helburu.
Animatu zaitezte parte hartzera!!!!
KLIKA KORRIKA!!!!
Joan den astelehenean, apirilak 8, eguerdiko 13:30ak inguruan, Baztan ikastolako ikasleak, lekukoa jaso zuten Elizondoko Ziga plazan. Herriko karriketan barna, euskararen aldeko oihuak aldarrikatuz ikasleak, irakasleak eta gurasoak korrikarekin bat egin genuen.
GURASOENDAKO TAILERRA, “KOMUNIKAZIOA ABERASTEKO GAKOAK”
Joan den ortziralean, martxoaren 22an, goitiko ikastolan gurasoendako tailerra izan genuen.
Aingeru Oiartzabal psikologoaren eskutik, “Komunikazioa aberasteko gakoak” landu genituen.
Gai honen inguruan, gure seme-alabekin ditugun zailtasunak atzemateko eta oinarri berriak eraikitzeko aukera izan dugu.
LARRALDEA SAGARDOTEGIAN TXOTX!
Aitzineko urteetako ohiturari eutsiz, joan de larunbatean, Lekarozko Larraldea sagardotegian ospatu dugu txot denboraldia. Ikastolako irakasle eta gurasoak mahai inguruan bilduta sagardotegiko menu goxoa dastatzeko aukera izan genuen.
Giro ederra sortu zen, hainbat guraso gitarra eta txistuaren doinuarekin alaitu zuten bazkaria.
Esker mila Guraso Elkarteak antolatutako ekintza honetan parte-hartu duzuen guztiei eta heldu den txotx denboraldira artio!
IÑAUTEAK, JEIKI GUZTIOK
Joan den ortzilarean, martxoaren 1an, iñautea ospatu genuen. Aurten Tolosako dianaz mozorrotuta, herririk barna dantzan eta kartari ibili ginen “Jeiki guztiok” diana kantaren soinuarekin.
Bukatzeko, parte-hartzaile guztiak, txokolate goxo-goxoa meriendatzeko aukera izan genuen.
ZUHAITZ EGUNA 2019
Otsailaren 17an, igandea, Zuhaitz Eguna ospatu genuen, Elizondoko Bailei eremuan. Eguraldi zoragarria izan genuen oinez joan nahi izan zutenak goizeko 9:00etan Elizondoko plazan elkartu ziren mendi ibilaldiari hasiera emateko eta bertzeak kotxez joateko aukera izan genuen.
Gogotik aritu ginen haur eta gurasoak aitzurrarekin zuloak egin eta gero, zuhaitz landareak sartzen. Hogei bat gaztainondo landatu genituen Baztango herri-lurretan. Aurtengo landaketaren helburua, zuhaitz guttiago eta koxkorragoak landatzea izan da eta hurrengo urteetan lur eremu berdinean landatzen jarraitzea aurreikusita dago.
Bukatzeko, Guraso Elkarteko kideak, ekintzan parte hartutako guztioi hamaiketako goxoa eskaini zien.
Eskerrak eman parte hartu zuten guraso guztiei eta laguntzaile izan genituen Tinka energiak, Lizardi garraioak, Betiko leihoak eta itxiturak, Albaitaritza, Citroen garaje Sansiñena, Malkorra eta Baztango Udala.
PIRRITX, PORROTX ETA MARIMOTOTSen MUSUA IKUSKIZUNA
Joan den igandean, otsailak 3, Elizondoko frontoian, Pirritx, Porrotx eta Marimotots gurekin izan genituen “Musua” izeneko emanaldia eskaintzen.
Urtero bezala, aurten ere, jende ugari hurbildu zen emanaldia ikustera, giro bikaina sortuaz. Txikiak, kantari eta dantzan aritu ziren gelditu gabe eta beraiekin batera helduak ere animatu ziren.
Guraso elkartetik eskerrak eman Baztango Udalari eszenatokia eta frontoia uzteagatik, Esarte harategiari eskainitako frito goxoengatik, Mikel Uhalderi egindako argazki zoragarriengatik eta bertara hurbildu zineten guztiei, esker mile denei eta datorren urtera arte!!
OLENTZERO ETA MARI DOMINGI GUREKIN
Abenduaren 24an, urtero bezala, Olentzero eta bere laguntzaile Mari Domingi Ilusioa banatzera etorri ziren.
Haur, gazte eta ez hain gazteek egin zieten harrera Zahar Etxeko atean eta, haur dantzariek aurreskua eskaini eta gero, herrian barnako kalejira ikusgarria hasi zuten txalapartaren soinuarekin. Aurtizko joaldunen joare hotsak aitzinean, ikazkinak eta Mari Domingik txistulariak, haur dantzariak, bertsolariak, koplakariak, Elizondoko musika banda Recreo eta jende andana izan zituzten lagun karriketan barna.
Guraso Elkartetik eskerrak eman nahi dizkiegu Elizondoko Herri Eskolari, gaztainak eta sagardoa banatu baitzituzten desfilean,, Falfarak elkarteko kideei, ikastolako parkean eskainitako pintxoengatik eta Foto Menari egindako argazkia politengatik. Eskerrak ere bai, Gabon kantak abestera animatu ziren abeslariei!!!!!
